Tena tatou katoa.
E hoa ma, ko te pire "GCSB" te kaupapa nui inatatanei i te Whare Paremata i tona panui tuaruatanga. Me tika taku korero mo te tu a te Paati Maori. Kaore matou i tautoko i taua pire. Koia te ia o aku kauhau tae atu ki nga panui whanui. Ko matou anake te roopu i kimi i nga huarahi hei whakatika i te ekenga ki runga o Tuhoe, a, ma matou tonu te committee Maori i aki ki te titiro hohonu nei ki taua take. Heoi ano, kaore a Reipa me Nahinara i whakaae mai. Kua tuhi reta matou ki te Pirimia mo nga ingoa o nga waru tekau ma rima tangata i ata tirohia i te GCSB i puta i te purongo o "Kitteridge". Ko te mea hoha rawa atu ko nga rupahu i puta i te Pukamata me nga korero hee nei. He hoha kia a au ko te korero a etahi e mea ana "anei te korero a tena" mea rawa ake, kei te hee rawa atu aua korero, i Hansards, i te nupepa ranei. Ma tera, ma riri etahi, me te aha i te mutunga? Kaati ake mo taua take.
Me huri te titiro i tenei wa ki te pahutanga mai o te ngawha i Ohinemutu. Kaore au i ohorere ki te korero mo te hutanga nei i te pa, me te katinga o te rori. Ka hoki nga mahara ki taua ahuatanga i te wa, i te whakawhanuitanga o te rori matua (Lake Road). I whakapotaehia, a, kei runga tonu te rori i aua wahi. Na, i puta te ngawha ki hea? Ki taku e mohio nei, kei te mohio tonu nga hunga kainga, ka nekeneke haere, a e kore e taea te puru kia moe. I te mea, he wa tona, ka puta i wahi ke, a koia ra te ahua i tenei wahi. Ko te tumanako, ka eke nga kaimahi o te Kaunihera ki te pa ki te tirotiro haere, kia whakangawari i te wairua o te iwi kainga.
te maori
Ara ano te herenga o tera aitua me te rori matua e whakaarohia ana i te rawhiti o te taone. Ko wai ka mohio ka ahatia mena ka hangaia te rori i te putake o Ngapuna ara, i nga ngawha, nga wahi kaukau, tunu kai ranei. Kia tupato!
Hei whakakopani, me korero au mo te take i tenei nupepa (15 Here-turi-koka) mo te tukino a tetahi kaitiaki i tetahi tamaiti i Rotorua nei. Koia nei te take, e kokirihia ana tenei take e te Paati Maori, kia kaua enei take e noho huna, engari, me whakaputa mena kei te tukinohia tetahi tamaiti. Kaiako mai, whanau mai, kaitiaki mai, rata mai, neehi mai, tari Kawanatanga mai, tatou katoa. Kaore i te tika ki te kii, kaore tetahi i paku mohio mo nga mahi tukino nei i te mea, i te pera te kino o te matua ki te tamaiti mo te rua tau - i te mohio tonu tetahi. No reira, kia kaha mai tatou, kia mataara! Tiakina a tatou tamariki, tautokona o matou whanau!
